لاچین

*علیرضا ج . قولونجو

سنی "جئيران"- آدلاديم

سني جئيران آدلاديم

"يوخ!"- دئدين

"ترلان؟"

        گولدون

"مارال؟"

"آيشين؟"

"آيلار؟"

     ...

وسوندا داريخيب

                    کوسوب

                              گئتدين

سنين آدينی تاپماق اوچون

چوخ چاليشاندان سونرا

                               "تاپديم"- دئيه    

ايزينجه "آراز"،ا کيمی قاچديم

گئچيکديييمی باغيشلا

"سارا"،م                   (1377 اسماعيل کريم زاده)             

        اونو ايلک دؤنه 1376- دا اورمو شعر و ادب درنه‌يينده تريبون آرخاسيندا شعر اوخورکن گؤردوم. درنکده شعرلری جيديه آلينا بيلن ان گنج شاعير ايدی. ائله او گون اونونلا  تانيشديم. سونرالار اونون باشقا شعرلرينی  ائله‌جه ده اؤيکولرينی اوخودوم؛ يازيلاريندا ديليميزين استاندارد شيوه‌سينين رعايت اولوندوغو گؤرونوردو. شعری ده فارس ادبياتی تاريخی حافيظه‌سی دئييل _ چوخلاريندا بئله‌دير_ تورک ادبياتی آخيميندا يئرله‌شيردی.

       اسماعيل-ی گؤرمه‌دن اوستده‌کی امتيازلاری گنج بير شاعيرين شعرينده گؤره‌بيله‌جه‌ييمه اينانا بيلمزديم. آنجاق اسماعيل-ی تانيديقجا اونون کلاسيک ادبياتيميزدا اولان موطاليعه‌سی، ديليميزين قيرامئرينی ياخشيجا بيلدييينی گؤردوکده، اونون هئچ ده گنج اولماديغينی اؤيرنديم.

18    -17 ياشلاريندا اولسادا بئله، نسيمی، فضولی، مختومقولو فيراغی، يونوس امره ... صمد وورغون، رسول رضا، ناظيم حيکمت، احمد عاريف کيميلرينی اوخوموش و آوروپانين يئنی ديلچيليک و ادبيات تئوريلری ايله تانيش اولان بيري هئچ ده گنج دئييلدير، دئيه، دوشونموشدوم...

يئنی ادبی تئوريلری اوخويان اسماعيل هر زامان يئنی سبکلری دئنه‌مکده‌يدی؛

اليم  الينين  سؤزلرين      سيخ باغلی   سيخ باغلی

ايره‌لی- گئری       گئری- ايره‌لی         نفس- کؤکس        دامار- قان     ساعات- ...

- ساعات؟   - ساعات؟  - ساعات!    ساعات- سن        ساعات- سن     ساعات – سن

ساعات              ساعات               ساعات

^{ساعات                 ساعات                 ساعات}                    

باخيشيم  باخيشينين  باخيشلارينين                تيليت قان   تيليت قان   تيليت قان

ايره‌لی- گئری       ايره‌لی- ساعات     ساعات- ساعات:     ايره‌لی- گئری

نفس- کؤکس     دامار- قان     ساعات- سن   ساعات- من    دامار- سن   دامار- من

نفس- قان       نفس- قان    نفس- قان 

       عسگر ايکن وطن تورپاغينين پوتينلری آلتدا تاپدالانديغينا بئله اوزولن ميلتچی شاعير آذربايجانيميزين هر بوجاغينی سئويردی؛

... سئودييين يورد

                       پوتينلريمله تاپدالانير

سئودييين اؤزه‌لليکلر ايسه

                       ايتگيندير اونيفورمادا  ...

       مسعود به‌ی هارای دئميشکن او اوزان عاريف-ين يا قاراباغ يا اؤلوم سسی اولوشدور. اؤز شعرلری ايسه آذربايجانيميزی هر سطيرده هر کليمه‌ده گؤسترمکده‌دير.  

     اسماعيل کريم‌زاده 1359 گونش ايلی آذربايجانيميزين چالديران بؤلگه‌سينده دونيايا  گؤز آچيب چوجوق ايکن عاييله‌سی ايله بيرليکده اورمو-يا کؤچموشدولر. 13-12 ياشلاريندان اعتيباراً  گئنيش موطاليعه‌لر ايله بيرليکده شعر يازماغا باشلايير و نئچه ايل سونرا اؤيکولری ده شعرلری ايله بيرليکده آذربايجان نشريه‌لرينده چاپ اولونور.

اورمو گنج يازارلار درنه‌يینين (بوتا) تمل داشينی قويانلاردان بيری اولان اسماعيل 3 دؤور آرديجيل بوتا-نين مرکزی شوراسی اويه‌سی کيمی چاليشميشدير.  کريم‌زاده-نين شعر و اؤيکودن اولوشان يازيلاری؛ پيام اورميه(نويد آذربايجان)، صدای اورميه، شمس تبريز، بوتا، سس و ... نشريه‌لرده ياييلميشدير. اسماعيل کريم‌زاده مسکن بانکاسينين ايشچيسی ايدی.

او اسفند آيينين اونبيرينده قاز-ين غفيلجه اوتاقدا  يايلماسيندان دولايی  دونياسينی ده‌ييشدی. روحو شاد...